لمتابعة آخر الأخبار والتغطية الكاملة يمكنكم زيارة موقع الإخبارية نيوز.
كشفت النجمة هالة صدقي عن كواليس مشاركتها في مسلسل «بيبو» مع مطرب المهرجانات أحمد بحر الشهير بـ”كزبرة”، مؤكدة أنها لم تتردد في خوض التجربة، خاصة مع أحد نجوم الجيل الجديد.
هالة صدقي تكشف كواليس مشاركتها في مسلسل «بيبو»
وقالت هالة صدقي في تصريحات خاصة لبرنامج “اللمة تحلي” على إذاعة شعبي إف إم مع الإعلامية وئام وجدي، إنها لا ترى أي مشكلة في المشاركة بعمل بطولته شاب من الجيل الجديد، موضحة: “ما ترددتش خالص إني أشارك في مسلسل بطولته شاب من الجيل الجديد، لأن إحنا خلاص شبعنا من فكرة إننا نثبت نفسنا أو ننتشر، إحنا نجحنا وعملنا اسمنا، لكن المهم دلوقتي إننا نكمل ونفضل موجودين، وده مش هيحصل غير لما نتواصل مع الأجيال الجديدة”.
وأضافت: “أحمد بحر (كزبرة) نجم من الجيل الجديد ولازم ياخد فرصته، وأنا نفسي في يوم من الأيام وقفت قدام نجوم كبار واتعلمت منهم، فطبيعي أدي الفرصة لغيري”.
وعن شخصية “إنعام” التي تقدمها، أكدت أنها لا تراها شخصية شريرة كما قد يعتقد البعض، قائلة: “أنا مش شايفاها شريرة خالص، بالعكس دي ست اتظلمت جدًا واتأذت واتحرمت من ابنها سنين طويلة، فطبيعي يكون عندها رد فعل قوي.. أي أم مكانها كانت هتعمل كده، هي بس بتحاول تحافظ على ابنها وعلى حقه”.
وأشارت هالة صدقي إلى أنها تحرص دائمًا على التنوع في أدوارها، موضحة: “أنا دايمًا بحب أعمل أدوار مختلفة، لأن التكرار بالنسبة لي مشكلة كبيرة جدًا، ممكن أقبل عمل مش مقتنعة بيه قوي، لكن ما أقبلش أكرر نفسي”.
وتابعت: “الجمهور دلوقتي بقى واعي جدًا وبيلاحظ كل حاجة، ولو حس إنك بتكرر نفسك بيقولك على طول، وده حقه طبعًا، علشان كده دايمًا بدور على حاجة جديدة أقدمها”.
كما أكدت أنها تهتم بمتابعة آراء الجمهور عبر مواقع التواصل الاجتماعي، قائلة: “أنا كمان بقرأ آراء الناس وبهتم بيها جدًا، لأن السوشيال ميديا خلت الجمهور فاهم شغلنا كويس أوي وبقى عنده رؤية ونقد، وده في صالحنا”.
واختتمت حديثها بالإشارة إلى قربها من شخصية “إنعام”، موضحة أن الشخصية تشبه كثيرًا نماذج حقيقية في المجتمع، خاصة المرأة الصعيدية، قائلة: “الست الصعيدية دايمًا قوية وهي اللي بتدير البيت حتى لو الراجل باين إنه المسيطر، لكن في الحقيقة هي الأساس.. وأنا أصلًا جذوري من الصعيد وبحب الصعيد جدًا، وده خلاني قريبة من الشخصية وفاهمة تفاصيلها كويس”.
